Kea ‑a ‑tmʋ wɛenyɔɔ' "kpei ‑tɩ
9
Dafi 'a 'dʋ ɔ "nyɩa dʋblei klaa" ɔ 'jea dɩ bla ‑wɛe ɔ 'jea ble ɛ.
2 'Ma muɛ Tʋ "bo 'a 'nynɩ "i 'bɛɛa' 'de 'ma pɛɛ ‑wee' "klein 'ʋn,
'ma muɛ ɛɛ' 'dɔe ɛ nʋa ‑wee'‑ 'a 'nynɩ "siia.
3 Ɛɛ' 'nynɩ "siia a muɛ 'ma 'mʋatɩ‑ nɩa',
'ma muɛ ɛ o blea, Kea ‑nɩa 'e dɩ ‑wee'‑ "klein "jrukpɔ' ɛ.
4 'Ma tʋnyʋ a ‑saa kɩɩn, ʋʋa blu' ʋʋa sɔn i 'de ɛmɛ Kea "juɛi.
5 Ɛmɛ ‑nɩ 'peejei ‑cɛɛn'‑, ɛ ‑teɛi 'de ɛɛ' 'beɔ kpatɛ‑ "kpei
‑wɛe ɛɛ 'wlʋ 'ʋn o, 'de ɛɛ 'tmʋ 'ma "kpei ‑tɩ.
6 Ɛ na 'blʋadinyʋ "kpei, ɛɛ ‑sa 'diwɔnyniʋn 'kmʋ
‑wɛe ɛɛ 'mʋʋ‑ ʋʋpʋ‑ 'a 'nynɩ 'bode ‑bode 'bode.
7 Tʋnyʋ se nɩ‑, ʋʋ sɔn i 'bode, ɛ wa ʋʋa' ‑kwlɔ 'mɛ,
ʋʋa' ‑tɩ' bluɛ nyʋ 'dii.
8 Tʋ "bo diɛ 'beɔ 'de nɔ" ‑wee'‑ 'di,
ɛ ‑teɛ ɛɛ' 'beɔ kpatɛ‑ "kpei ‑wɛe ɛɛ 'je 'pee.
9 Ɛmɛ ‑ɛɛ po 'blʋa ‑wee'‑ ‑je o,
‑wɛe ‑ɛɛ ‑wlʋ 'pee 'de "isrɛa' 'ʋn.
10 Tʋ "bo mɛ nyɔ nyʋ a cria a 'wlaa "jru ‑sɔn,
ɛmɛ nyʋ ‑ʋʋa dɩ a cɛan a 'wlaa sro'.
11 Nyʋ ‑juua ‑ma 'nynɩ ‑mʋ a 'wlaa ‑ʋn sro',
'de Tʋ "bo, ‑maa' 'bɔ nyɔ ‑ɔɔ ‑pɔan' ‑mii' ɛ.
12 Ao blee Tʋ "bo ‑nɩa 'e Selisalɛmʋ o;
ao "si ɛɛ' 'dɔe ɛ nʋa 'a 'nynɩ 'de 'blʋɩ ‑wee'‑ 'dii,
13 Ɛɛ nʋɛ nyʋ ‑ʋa ‑wla nyɔ 'ɔ ‑nmɔ i, ‑wɛe
ɛɛ poɛ nyʋ ʋʋa' nʋa ‑crʋʋ" "jrii ‑tɩ' ‑kwlʋ o,
‑wɛe ɛɛ' "mae wɛenyʋ 'a 'dawlu o.
14 ‑Ɩn ‑je 'ma wɛe 'oo Tʋ "bo,
‑ɩn ‑gbʋn 'ma "nmiatɩ‑
'ma 'ʋnyɛʋn ‑ja 'ʋn "kpei ɛ,
‑mɔ ‑sa 'ʋn 'bo 'mɛ bie "wɛin.
15 ‑Wɛe 'ɩn 'je ‑ma 'nynɩ "i 'bɛɛ 'de nyʋ "klein ‑ʋʋ ‑tea i
'de ‑ta Selisalɛmʋ nyʋ a 'kɩɩan "jrui "juɛi.
‑Wɛe dɛ ‑ɩn ‑nɩa 'ma 'pʋʋ i ɛ 'ɩn 'je ɛɛ 'mʋa‑ nʋ.
16 Nyʋ ‑sea' Kea juuo a bluɛ "bie ʋʋa' ‑cɛ" "blua 'di.
Ʋʋa' bɩ a 'kpa ʋʋa' ‑cɛ" 'ɛ 'sai 'di.
17 Tʋ "bo ‑sa ɛɛ' ‑cɛ" 'kwla, ɛɛ 'tmʋɛ tɔi" ‑tɩ,
ɛ kpʋn 'diwɔnynii 'mɛ 'de ɔɔ' ‑cɛ" 'ɛ ‑sebɩɛ 'di. ‑Te' ‑kwlʋ.
18 'Diwɔnyniʋn ke nyʋ ‑sea' Kea juuo ke
ʋʋ mu 'de 'mɛʋn o ‑kwlɔ,
ʋʋ ke 'blʋadinyʋ "klein ‑a ‑ma" e a Kea o ke‑.
19 Kea 'a "mae‑ wɛenyɔɔ' ‑tɩ' o,
wɛenyɔɔ' dɛ ‑kwlɩ" ‑tea' se i sɔn ‑ta 'ble.
20 ‑Ɩn ‑sɔn 'ʋn Tʋ "bo, nyiɔ 'bo tʋ 'a "jru kpaa.
'Blʋadinyʋ 'a 'pee 'je 'jeeɛ ‑o 'bo ‑ʋn "juɛi.
21 Ɛ po ʋʋpʋ‑ faʋn 'di
‑wɛe ʋʋ 'jeɛ juuo ka ʋʋ nɩa nyiɔ ɛ. ‑Te' ‑kwlʋ.